Ágúst Atlason | mánudagur 11. apríl 2011

Af fingrum fram með Jóni Ólafs á Ísafirði!

Að kvöldi skírdags verður haldin skemmtidagskrá í Hömrum, sal Tónlistarskóla Ísafjarðar. Þá mun tónlistarmaðurinn Jón Ólafsson, oftast kenndur við Nýdönsk, fá til sín góðan gest í spjall og saman munu þeir slá á létta strengi og taka nokkra létta slagara. Gestur Jóns þetta hátíðarkvöld á Ísafirði verður enginn annar en Helgi Björnsson.

 
Af fingrum fram er yfirskrift kvöldstunda sem stýrð eru af Jóni Ólafssyni, tónlistarmanni og haldin hafa verið síðustu misseri við frábærar undirtektir. Nafnið er fengið úr samnefndum sjónvarpsþáttum sem RÚV sýndi í þrjá vetur fyrir nokkrum árum við miklar vinsældir. Helgi okkar Björnsson verður gestur Jóns í Hömrum á skírdag og hefst viðburðurinn kl. 20.00  Um er að ræða sambland af tónleikum og spjallþætti á sviði sem hafa verið á fjölum Salarins í Kópavogi s.l. þrjá vetur. Þar hefur Jón tekið á móti ýmsum góðum gestum og ávallt verið húsfyllir.
 
Jón þykir ná einstöku sambandi við viðmælendur sína og áhorfendur virðast kunna vel að meta nálægðina við listamennina. Jón og Helgi fara í gegnum vinsælustu lög og texta Helga og áhorfendur fá að heyra um eitt og annað forvitnilegt frá litríkum ferli söngvarans. Þeim til aðstoðar í nokkrum lögum verður bassaleikarinn knái Valdimar Olgeirsson frá Bolungarvík en hann fékk nýverið sérstaka viðurkenningu á uppskeruhátíð Tónlistarskólanna.
Af fingrum fram hefst eins og áður segir kl. 20.00, fimmtudagskvöldið 21. apríl í Hömrum. Miðaverði er stillt í hóf og kostar því 2.000 kr. á þennan viðburð. Miðar verða eingöngu seldir við innganginn. Atburður þessi er hluti af Aldrei fór ég suður dagskránni.