2010

Ólöf Arnalds

Ólöf er fjölhæf og leikur fallega tónlist á ýmis hljóðfæri auk þess sem hún syngur eins og engill.


Bloodgroup Systkynin frá Egilsstöðum og færeyski vinur þeirra léku á Aldrei fór ég suður fyrir þremur árum og vöktu stormandi lukku. Síðan þá hafa þau farið víða, meðal annars til fyrrverandi vinabæjar Ísafjarðar, Hróarskeldu í Danmörku.


Urmull

Urmul er óþarfi að kynna fyrir þeim sem stunduðu Sjallann á Ísafirði snemma á tíunda áratug síðustu aldar. Hinum til fróðleiks má segja að Urmull er ein þeirra sveita sem hefur mótað heila kynslóð Ísfirðinga og veitt mörgum unglingnum sína fyrstu sýn inn í heima gruggsins.

 

Dikta

Dikta er án efa ein vinsælasta hljómsveit landsins og eru þeir piltar vel að vinsældunum komnir. Fáir ef nokkrir eru betri í að flytja fólki fallegar og hrífandi laglínur og kann lýðurinn vel að meta það.

 

Hjaltalín

Hjaltalín þarf vart að kynna. Þau snúa nú aftur á hátíðina og nú með m.a. „Plötu ársins“ og „Rödd ársins“ í farteskinu.

 

Bróðir Svartúlfs

Bróðir Svartúlfs er hip hop hljómsveit frá Norðurlandi. Þeir eru ein þeirra hljómsveita sem hafa brotist fram á sjónarsviðið í gegnum Músiktilraunir Tónabæjar. Sjálfir lýsa þeir tónlist sinni sem blöndu af Sigurrós og Rage against the machine.


Lára Rúnars

Lára Rúnarsdóttir er söngkona sem syngur fallegar melódíur með persónulegum textum.

 

Pollapönk

Pollapönk er skipað afskaplega barngóðum rokkurum úr Hafnarfirði sem hafa í nokkur ár skemmt börnum víða um land með góðum árangri.


Mið-Ísland

Þarna eru á ferðinni nokkrir af fyndnari mönnum landsins. Þeir félagar ætla að koma til Ísafjarðar í tengslum við hátíðina í ár og skemmta heimamönnum. ???
Lay Low 

Lay Low heitir réttu nafni Lovísa Elísabet Sigrúnardóttir og hefur getið sér gott orð síðustu árin fyrir blús- og köntrítónlist sína.

 

Sigríður Thorlacius 

Þessi söngkona hefur sungið sig inn í hjörtu landsmanna með hljómsveitinni Hjaltalín, Megasi og Björgvini Halldórssyni svo einhverjir séu nefndir. Hún gaf nýverið út plötuna Ljúflingshóll þar sem hún flytur lög eftir Jón Múla Árnason og var nýverið kosin „Rödd ársins“ á Íslensku tónlistarverðlaununum. 


Morðingjarnir

Morðingjarnir eru þrír hóflega hressir piltar að sunnan sem spila hraða pönkmúsik.


Hudson Wayne

Hudson Wayne ættu flestir að vera farnir að þekkja, en færri vita kannski að þetta er fyrsta hljómsveitin sem steig á stokk á Aldrei fór ég suður þegar hátíðin var fyrst haldin árið 2004.


Sólinn frá Sandgerði

Með dyggum stuðningi frá Sandgerðisbæ hefur tekist að fá þessa efnilegu ballsveit vestur til Ísafjarðar. Fremstur í flokki er enginn annar en Kiddi Casio, frontmaður af Guðs náð sem hefur sérstakt lag á að trylla kellingarnar.


Rúnar Þór 

Rúnar Þór Pétursson, eða Rúnar Péturs Geirs eins og hann er betur þekktur á Ísafirði, er gamalkunnur tónlistarmaður sem hefur mörg böllin sopið. Sólgleraugun, svarti leðurjakkinn og fallegu píanólínurnar eru það sem helst einkennir Rúnar.

 
Geirfuglarnir

Árið 1991 stofnuðu tveir starfsmenn á Barna- og unglingageðdeild Landspítalans þessa hljómsveit sem hefur verið starfandi síðan þá. Nokkrar mannabreytingar hafa verið á sveitinni í gegnum árin eins og gengur og gerist en grundvallarheimspekin á bakvið hljómsveitina stendur samt eins og klettur í hafi. 


Ingó og Veðurguðirnir

Eins og flestar góðar ballsveitir varð þessi til í kringum aðdáun hjómsveitarmeðlima á Ísfirðingnum og balllistamanninum Helga Björnssyni. Sveitin varð til árið 2003 og hefur síðan þá notið stigvaxandi vinsælda, ekki síst eftir að forsöngvarinn vakti lukku í raunveruleikaþætti í sjónvarpi.

 
Biggibix 

Biggibix, eða Birgir Örn Sigurjónsson, er ísfirskur tónlistarmaður sem leitar inn á við eftir innblæstri. Hann naut góðs af risavöxnu plötusafni foreldra sinna og hélt sína fyrstu tónleika í kjallara íbúðablokkarinnar þar sem hann ólst upp.


Orphic Oxtra

Innblásin af menningu Balkanlandanna kemur þessi hljómsveit vestur á firði, en þrír meðlima hennar eru Ísfirðingar. Hljómsveitin varð til á kaffistofu Listaháskóla Íslands.


Skúli hinn mennski

Ísfirski trúbadúrinn Skúli Þórðarson er undanbragðalaust kallaður Skúli hinn mennski til aðgreiningar frá ekki síður þekktum nafna sínum af hundakyni sem réði ríkjum á Seljalandsvegi á Ísafirði um síðustu aldamót. Skúli, sem nú er horfinn á hinar eilífu veiðilendur, vakti mikinn hlýhug í hjarta eiganda sinna og annarra sem báru gæfu til að hitta hann.


Stjörnuryk

Fjórir hip-hopparar að vestan sem yrkja rímur um ísfirskan raunveruleika. „Ætlaði að kaupa mér Kroppsælu en mig vantaði 200 kall uppá“ og „Shit hvað þetta þetta er góð kringla“ eru meðal lína sem gætu hljómað í lögum þeirra. ???MC Isaksen ??Framtíð vestfirska hip-hopsins er vissulega björt því MC Isaksen hefur fundið sitt rímnaflæði þó hann sé ekki einu sinni kominn í gaggó.

 
Klikkhausarnir 

Klikkhausarnir eru unglingahljómsveit úr héraði sem hefur vekið athygli fyrir kraftmikla framkomu.

 
Hjálmar

Lopapeysureggíbandið Hjálma þarf varla að kynna fyrir neinum. Þeir koma nú fram á AFÉS í annað sinn.

 
Rúnar Þóris

Úr framvarðasveit íslensku nýbylgjunnar kemur Rúnar Þórisson sem Ísfirðingar þekkja vel úr hljómsveitinni Grafík sem ítrekað lyfti þakinu á félagsheimilinu í Hnífsdal og víðar á 9. áratug síðustu aldar.

 

Mugison

Besta plata ársins 2004. Besta plata ársins 2008. Sómi Súðavíkur 2007. Þarf að segja meira þegar menn eru hlaðnir svona titlum?


Yxna

Það gera börnin sem fyrir þeim er haft, en í þessu tilfelli er því öfugt farið. Hafnarstjórinn Muggi er fremstur í flokki í þessari stórgóðu hljómsveit en með honum eru forstöðumaður Byggðasafns Vestfjarða, framkvæmdastjóri Atvinnuþróunarfélags Vestfjarða og lektor í veiðitækni við Háskólasetur Vestfjarða.


Tom Hannay

Bolvíkingar þykjast eflaust eiga eitthvað í þessum unga Breta sem leikur angurvært en samt kraftmikið popp. ???
Ugly Alex ??Harðkjarnaband að norðan. Aðstandendum fannst vanta meira overdrive á hátíðina og fengu því þessa ungu Akureyringa, og einn Ísfirðing, til liðs við sig.

 
Jitney

Það gleður aðstandendur AFÉS að geta tekið þátt í norrænu samstarfi. Frá Odda í Noregi koma þessi fjórir ungu menn sem leika dulmagnað rokk&ról.


Korter í þrjú

Úr kjallara húsmæðraskólans á Ísafirði koma tveir technohausar sem ætla að sýna okkur að ekkert hefur breyst þó búið sé að færa PartyZone yfir á fimmtudaga. 


Biogen

Það þótti of lítið að hafa bara eitt technoatriði, svo Biogen er aftur boðinn velkominn vestur. Biogen þekkir hvern haus og sporð á Ísafirði, enda er pabbi hans með fiskmarkað í bænum.


Drengjakórinn Konráð

Ungir drengir úr Gaggó Vest (Gagnfræðiskólanum á Ísafirði). Þeir eru að stíga sín fyrstu skref í bransanum og ætla að telja í eins og tvö lög fyrir hátíðargesti.


Sesar A, BlazRoca og DJ Kocoon

Úr Hlöðuvík í Sléttuhreppi koma bræðurnir Sesar og Blaz og hafa með sér skífuþeytarann Kocoon. Hart rapp sem skilur engan eftir ómóðgaðan.

 
NineElevens

Þegar þessar risaeðlur voru upp á sitt besta voru þeir 15 árum á eftir sinni samtíð, en eru núna orðnir heilum aldarfjórðungi á eftir því sem gengur og gerist í rokkinu. Tímarnir breytast og mennirnir með, en ekki þessir.

 
Óminnishegrar

Framlag Menntaskólans á Ísafirði til hátíðarinnar í ár. ???Baunirnar ??Hressir menn sem ætla að blása hátíðina í hús.