Kristján Freyr Halldórsson | fimmtudagur 1. febrúar 2018

FYRSTU ATRIÐI TILKYNNT Á ALDREI FÓR ÉG SUÐUR 2018

Þar kom loks að því að við heyrðum einhver tíðindi af Aldrei fór ég suður 2018. Og engin smá tíðindi! Það er hér með kunngjört hvaða 10 hljómsveitir af 14 munu prýða hátíð ársins.

 

Aldrei fór ég suður er nú haldin í fimmtánda sinn (pælið í því!) og verður eins og áður á Ísafirði um páskana. Aðaldagskráin verður eins og síðustu 2 ár til húsa í Kampa-skemmunni á horni Ásgeirsgötu og Aldrei fór ég suðurgötu og stendur yfir í tvo daga, föstudaginn langa 30. mars og laugardaginn 31. mars. Þar að auki verður boðið upp á ýmsa hliðardagskrá frá miðvikudegi til sunnudags víðsvegar um Skutulsfjörð sem og nágrannabyggðarlög.

 

En þá af tíðindum dagsins! Fyrstu atriðin sem kynnt eru til sögunnar eru eftirfarandi: 

 

KOLRASSA KRÓKRÍÐANDI, DIMMA, JÓI PJÉ OG KRÓLI, BETWEEN MOUNTAINS, UNE MISÉRE, HATARI, CYBER, Á MÓTI SÓL, AUÐUR og SIGURVEGARAR MÚSIKTILRAUNA

 

Já, okkur fannst þessi listi verðskulda feitletrun og hástafi. 

 

Hljómsveitina Kolrössu Krókríðandi (síðar Bellatrix) þekkja allir vonandi. Hún sigraði Músiktilraunir 1992 og heimsótti Ísafjörð skömmu síðar en hefur aldrei komið áður á Aldrei fór ég suður. Dimma er vafalaust ein vinsælasta rokkhljómsveit landsins og spilar loks á Aldrei. Um Jóa Pjé og Króla þarf ekki að fjölyrða enda eitt það vinsælasta á landinu í dag. Við Vestfirðingar erum afar stoltir af þeim Kötlu og Ásrós í Súg- Dýrfirsku hljómsveitinni Between Mountains sem gaf út frábært myndband á dögunum og gleður það okkur mjög að tilkynna komu þeirra á hátíðina í ár. Eins og flestir vita sigruðu þær Músíktilraunir í fyrra. Une Misére afrekaði það að vera í 4. sæti á þungarokkshátíðinni Wacken í Þýskalandi í fyrra og skartar trommaranum Benna Bent frá Vöðlum í Önundarfirði. Hatari var annað árið í röð valið “best live act” í mörgum miðlum sem hlýtur að útleggjast „Bestir á balli”. Það má enginn missa af Hatara. 

 

Cyber inniheldur nokkra meðlimi Reykjavíkurdætra og gáfu þær út hina frábæru plötu Horror fyrir jólin. Þær nefndu sveitina eftir uppáhaldsvaralitnum þeirra úr Mac snyrtivörulínunni.
Á móti sól … vá, hvað getur maður sagt? Loksins! Jebb, þetta eru stórtíðindi! Það var löngu kominn tími á Magna og félaga. Við getum ekki beðið! Auður er listamannanafn Auðuns Lútherssonar sem hefur vakið gríðarlega athygli fyrir seyðandi R&B tónlist – við hlökkum til að sjá hann á Aldrei-sviðinu. Loks eru það Sigurvegarar Músiktilrauna sem við vitum svo sannarlega ekkert um á þessari stundu en erum mjög stolt af samstarfi okkar við Músiktilraunir, en síðustu árin hafa sigursveitir tilraunanna heimsótt hátíðina. Sigurvegarar Músiktilrauna verða krýndir helgina fyrir páska og mun því sigursveitin ekki ráðast á garðinn þar sem hann er lægstur heldur spila á Aldrei fór ég suður nokkrum dögum síðar.

 

 

Svo er þetta nú ekki upptalið því fjögur atriði eiga enn eftir að bætast á lista hátíðarinnar í ár. Hátíðin ætti því að vera mikið tilhlökkunarefni fyrir tónlistarunnendur og allir ættu að geta fundið eitthvað fyrir sinn snúð. Þarna er þungarokk, þarna er vinsældarapp, indípopp, sveitaballapopp, kuldadiskó, R&B og fleira. Landsþekkt atriði sem og minna þekkt.

 

Við hvetjum alla að hefja undirbúning heimsóknar til Ísafjarðar um páskana – enda Ísafjörður fyrir löngu orðinn heimavöllur páskanna.